11 يناير 2010 ~ 0 تعليق

عبدالكريم الجباري لا يا حمد

هذه القصيده موجهه للشاعر حمد السعيد بعد انتهاء برنامج شاعر المليون


لا يا حمد لا تنتظر طلعت سهيل
اترك كلام الناس واسمع كلامي
في وسط قلبي طعنتن هدة الحيل
وانا عزيز ولا تردى مقامي
مثلت داري بالشعر خير تمثيل
وتكريمهم لي طردتي من دوامي
شاركت من ضمن الرجال المشاكيل
وفرضت قدام الشعوب احترامي
لكن من يفرق لك العدل والميل
بالزاد لا تشره علي يا صيامي
من اول سنيني وانا احط واشيل
واليوم مابه من يشد اهتمامي
ياذيب لو جاوبتني تالي الليل
العذر مابلل حلوق الضوامي
الراس مايرجع عقب عزته ذيل
لو عزز التاريخ بعض الاسامي
يا شعر بعطيك الاصايل من الخيل
وابيك تلحق غايتي مع مرامي
بزيد كيل السالفه وادبل الكيل
متوكل بالله وبكرب حزامي
من كيف شعري لو اهز الفناجيل
حطيت لي بصمة شرف في بهامي
بعض الشعر يرعب هديره كما السيل
لا من درج سيله يطم لعدامي
وبعض الشعر نابع من الهم و الويل
وبعض الشعر كنه مسلسل درامي
وانا ليا مني بدعت التماثيل
علقت في صدر المراجل وسامي
اعيش في جيلي واسابق مية جيل
وارجع على ماضي جدودي واحامي
انا حفيد الطيبين الحلاحيل
هل السيوف اللي تقص العظامي
واكبر كرامه مكسبي للرجاجيل
ومصافح محمد شبيه القطامي
لا يا حمد لا عاد تنشد عن سهيل
وارسل لراعين المواقف سلامي

عبدالكريم الجباري
Share
Tags: , , , , , , , , , , , ,


Leave a Reply